| 1 | [ PRAEF.---N. 1. A me tibi efflagitas suffraganda. Id est, supplenda, ut lib. I Sent., cap. 10, de angelis: Mutabilitatem itaque naturae suffragatur in illis contemplatio Creatoris. Hoc est, supplet, compensat mutabilitatis infirmam conditionem, et naturae debili subsidio est. Gloss., suffrago. βοηθῶ. Itemque βοηθῶ, adiuvo, suffrago, subvenio, opitulor. Ibid. Ego autem satisfacere studio animoque tuo decursa priorum monumenta non demoror. Hoc est: ego opere non parco, quominus evolvendis priorum scriptorum monumentis, ex ipsis studio animoque tuo satisfaciam. Ibid. Caput 76 in Isidorianis hoc titulo praenotatur: De natura rerum liber Isidori ad Sisebutum regem. Editiones, mss. Codices, excerpta, caput quoddam huius libri nondum editum. Carmen astrologicum huic libro additum, fortasse Isidori, compendium metricum eiusdem libri nondum editum, fortasse sancti Eugenii Toletani. Hunc librum notationibus suis Grialius illustravit, cuius nomine propterea proferuntur Pro decursa priorum monumenta, alii decursis priorum monumentis. AREV. ] Dum te praestantem ingenio, facundiaque, ac vario flore litterarum non nesciam, impendis tamen amplius curam, et quaedam ex rerum natura vel causis a me tibi efflagitas suffraganda. Ego autem satisfacere studio animoque tuo decursa priorum monumenta non demoror, expediens aliqua ex parte rationem dierum ac mensium, anni quoque metas, et temporum vicissitudinem, naturam etiam elementorum, solis denique ac lunae cursus, et quorumdam causas astrorum, tempestatum, scilicet signa, atque ventorum, necnon et terrae positionem, alternos quoque maris aestus. |
| 2 | [ 2. Al., viris didicimus, ac maxime. AREV. ] Quae omnia, secundum quod a veteribus viris, ac maxime sicut in litteris catholicorum virorum scripta sunt, proferentes, brevi tabella notavimus. Neque enim earum rerum naturam noscere superstitiosa scientia est, si tantum sana sobriaque doctrina considerentur. Quinimo si ab investigatione veri modis omnibus procul abessent, nequaquam rex ille sapiens diceret: Ipse mihi dedit horum quae sunt scientiam veram, ut sciam dispositionem coeli, et virtutes elementorum, conversionum mutationes, et divisiones temporum, annorum cursus, et stellarum dispositiones. |
| 3 | Quapropter incipientes a die cuius prima procreatio in ordine rerum visibilium exstat, dehinc caetera de quibus opinari quosdam gentiles vel ecclesiasticos viros novimus, prosequamur, eorum in quibusdam causis, et sensus, et verba ponentes, ut ipsorum auctoritas dictorum fidem efficiat. |